معلومات تهم الفرقة الاولى ..... ادخل هنا

بصوا احنا هانبدأ إن شاء الرحمن بمادة الدينتشن

يعني ايه دينتشن dentition
dentition يعني تسنين بالعربي ، والاسم دا المفروض مايطلقش على المادة ، بس دا الشائع ، زي مابنقول على الفارماكولوجي ، فارما ، وزي مابنقول على الهيستولوجي ، هيستو ، وزي مابنقول على عبيط ، عبي

المادة دي اسمها الصحيح Dental Anatomy & physiology ، وبنقول عليها بالعربي ، تشريح وصفي
لأنكم في الأول هاتخدوا معلومات كده عن البؤ والأسنان ، كتمهيد علشان تفهموا اللي بعد كده ، وبعدين ازاي بنرقم الأسنان ونظم الترقيم اللي بنشتغل بيها في مصر ونظام الترقيم العالمي ، والأمريكي .

المهم
المادة دي زي ماقلت بتدرسوا فيها مقدمة في الأول عن البؤ والأسنان ويعني ايه التسنين وأنواعه ونظام الترقيم بتاع الأسنان ويتكلم عن أنواع الارتفاعات elevations والانخفاضات depressions في كل سنة وكذالك أنواع الحذوذ grooves التي تمر بكل سنة وكده علشان تبقى عارف المصطلحات دي ومعناها ايه وبتبقى موجودة فين. بعد كده في جزء أسمه dental Anatomy ودا بتمسكوا فيه كل سنة بتدرسوها بالتفصيل ، يعني القواطع مثلا عندنا قاطعين فوق في الفك العلوي وقاطعين تحت في الفك السفلي ، بتدرسوا كل واحد على حدة بالتفصيل الممل وبالرسم
والرسم مهم جدا .
وبعدين الأنياب ، واحد علوي وواحد سفلي ، وبعدين النواجذ أو القبطواحن وهما 4 ، 2علوي و 2 سفلي ، وبعدين الضروس أو الطواحن وهما 6 ، 3علوي و 3سفلي ، واللي قلناه دا في كل ربع من كل فك بالنسبة للشخص البالغ
ودا كله هاتنحتوه على الشمع .

لأنكم بعد لما هاتخلصوا دا هاتخشوا على الأطفال
لان الأطفال عندهم عدد أقل من الأسنان ، وطبعا لايوجد لديهم نواجذ أو قبطواحن ، كما أنهم عندهم ضرسين في كل ربع من كل فك

وبعدين تخشوا على جدول جامد فحت
جدول التسنين ، جدولين ، بس ايه ، مهمين جدا جدا للدكتور
امتى السنان بتتكون بعد الحمل ، وامتى بتطلع الأسنان اللبنية في بؤ العيل ، وامتى بتقع ، وامتى بيطلع بدالها ، وامتى ، وامتى كتيره أوي ،

بعد كده ازاي تسنن mandible يعني فك عظمي من شوية حاجت هايعرفوهالك ودا ممكن يجي عملي ، وكمان ازاي تسنن جمجمة طفل صغير ممكن لسه مولود أو عند كام سنة كده أو Adult وكل دا من الأسنان والعظم الفكي ، وازاي تتعرف على كل سنه لأن الدكتور ممكن في الشفوي برده يديلك سنة ويقولك دي ايه فانت تعرفها وتقوله دي ايه ودي يمين واللا شمال ، وعرفت منين ، وتتناقش معاه ، برده الجماجم كده في الشفوي ، دي جمجمة لواحد أو طفل عنده كام سنة وكده ، وبرده الـ mandible كده وعرفت منين .

بعد كده تخش على جزء الفيسيولوجي ودا جزء بيقولوا عليه دا أسهل وألذ بكتييير من كل اللي هاتكونه أخدتوه ،
بتدرسوا فيه المنحنيات اللي بتحرك في الفك
بتدرسوا فيه الاطباق ، يعني كيف يطبق الفك السفلي مع العلوي
وتدرسوا الطباق بتاع كل سنة
وبس خلاص

بالنسبة للعملي نحت السنان على بلوكات شمع بتشتروها ، ومفيش أدوات بتشتروها في السنة دي على مستوى كل المواد غير أدوات النحت
Wax Carver
Wax Knife
وبعد لما بتخلصوا النحت ، بيدربوكوا ازاي تتعرفوا على السنان وازاي تتعرفوا على عمر الجمجمة والفك وكل دا
دا زائد انكم بيبقى معاكم كتاب عملي بترسموا فيه ،
بس
وامتحان الفاينال العملي بيبقى carving بس ، نحت بس يعني
، وكمان بيبقى فيها كل سكشن هاتعملوا فيه ايه بالظبط ، يعني السكشن دا هاتنحتوا كذا ، والجاي مراجعة على اللي نحتوه ، واللي بعده كذا ، ، ،

تم الجزء الأول

انتظروا البقيه هنا .....